Cerite Singket, Muneldik

Redaksi Bara News

- Redaksi

Jumat, 29 Maret 2024 - 17:49 WIB

50949 views
facebook twitter whatsapp telegram line copy

URL berhasil dicopy

facebook icon twitter icon whatsapp icon telegram icon line icon copy

URL berhasil dicopy

BUDAYA | Lo minggu waktu e gere sekulah. Lagu biasa e, Ama Ine ku beluh ku empus. Aku pe lagu kiset di taring i umah seserengku. Akhire aku pe beluh mununung Ama urum Ineku ku empus. Empus ni kami gaib pora Ari umah, Ara sekiter 8 (waluh) batu Ari umahku, tempat te iseputere jelen KKA arah ku Lhokseumawe.

Wan perjelenen aku kunul terjendela ni motor, sesiro mumanang Lues ni empus kupi si Ara ikabupaten ku. Kabupaten ku bergeral Bener Meriah. Kabupaten ayu ben ilen jawe Ari kabupaten Aceh Tengah. Wilayah kabupaten ku Gere rata mu baur baur urum mubebuntul, Ara pematang Ara Arul. Meh ne perempuan kupi Ara i rinang ni baur cempege Burni Telong. Lalu aku munerah perempusen kupi urum deleni batang ni Pokat akhire kai pe sawah ku empus.

Begitu sawah Ama renye munuke kunci ni jamur empus. “Win talu amangku, Hana Ama (kujeweb)
Mai jelbang nga kini, kati kite kuruk ketol mulo, kati muneldik kite.

ADVERTISEMENT

SCROLL TO RESUME CONTENT

Yoh ? Hana ke muneldik Ama.
Ijeweb Ama ku. Munengkam gule wen. Gule Hana Ama, gule Ili Wen. Bohmi Ama, kubueten aku pe gere mutungkah.

Kune ke cara e muneldik Ama. Pengunen ku. Oya kati Mai jelbang nga ku ini. Kite kenal mulo ketol le kin pakan ne. Karena murasa penasaren kukunei mien, Hana ke muneldik Ama ?.

Neldik ni ngenal gule urum cara i kik ki, tape gere pakek mate nekik si mukawit ta. Yoh Ike lagu oya selo mera Kona Ama jeweb ku. Mera win ? I jeweb amangku.

Lagu ini cara e, Ketol ni kite cucuk mulo urum lidi kemudien kite oboh tali benang nge, renye kite sambung sambung ketol ni. Meh oya baro kite urumen dan kite lilit urum ikot gelah king. Selanjut te kite ikoten mien ku ujung ni kayu si kite obon kin gelas ni teldik ke.

Ama gelas Gere ke tempat minum kupi, Ama?. Kemudien ijeweb Ama ku. Beta di aha anak ku. Tape Ike gagang ni kik atau pancing Ike bahasa Indonesia e oya geral le wan bahasa Gayo gelas ni Kik win. Faham ke ko ? O ..Beta ke Keta Ama, faham aku.

Mumenge penjelas ni Ama, Ahir re gere ne naru pengunen ku, Selanjut te Ama pe renye munyucuk ketol urum benang. Gere mokot Ari one aku urum Ama berangkat ku gendiring ni Arul, i peruluken ni empus ni kami. Isone Ara waih mujalir jernih pedih den dele pedih atu e. Kene amangku isone ara mukeltung. Wen, biasa e isone dele pedih gule Ili e. Cube mulo kite teldik.

Langkah pemulo Ama renye munetuh ni teldik ke wan loyang ni atu..langsung isemer ni ilen Ili. Ter…Ter…. Ili muloi mujentik. Serius pedih Amangku, kemudien tegun ne ku atas. Ara roa iken ili si lekat. Lanyut mien tuh ni ama mien teldik ku selang selang ni atu, Ara mien Kona gule Ili e. Ter…Ter…Ter… Sintak plin sangking dele we gule Ili. Meh oya teldik si tos Ama ne osan ne ku aku. Nah ko mi wa muneldik sesiro belejer. Aku ku pongen mulo Ine mu mungutip kupi. Boh mi Ama, jeweb ku.

Renye ku tunung lagu si buet ni Ama. Ter.. Ter…Ili mujentik, ku tegun kuatas Kona Ara pepien gule Ili. Aku pe memakin seni dan makin sunguh. Tuh rerenye teldik kowan ni celah ni atu. Renye ku uken uken nen. Gere terasa Lo nge male jem due belas porak Lo. Renye ku penge Ama mentalu. Win …win ..ulak mi wa atas Lo timang perin amangku. Mumenge Ama mentalu aku pe renye tir tir ulak. Galak pedi atengku karena dele gule Ili si Kona teldik.

Baca Juga :  Cerite Singket : Kisah Aman Mayak Gere Mangan Bandang

Sawah ku jamur renye kutuangen iken Ili hasil muneldik ne kowan ayan kucak. Sebelum me nge ku oboh waih he. Kupen dele hasil le, Ara betengah due kal. Renye perin Ama oya ke nge basah belanga ruhul ni perin ne. Enta sana maksudte gere faham aku.

Kemudien gule Ili renye i tukei Ine, meh Oya Ine mumipis awas atan legen kayu. Ara lede caplak, Ara kuning, Ara asam jantar, Ara terong padul, Ara lasun ilang, Ara kemili, empan, Tamah gegarang.

Meh oya gule Ili ne oboh Ine asam me mulo meh oya i basuh he mien. Baro ayon ne kowan belanga kancah renye icampur awas si gilingi Ine. Awas se kuengon lede, kuning, kemiri, lasun ilang, lasun ulung urum tikik ulung gegarang. Selebih he oboh Ine terong padul tamah Ine asam jatar. Meh oya Baro itamah Ine waih he tikik. Selanjut te i jerang urum belanga kancah kuatan keliliken tungkuh tige urum porak ni rara. Sekira 10 menit. Jantar gule Ili enge musiyu mudedek. Kemudien ine munuet sendok kucak den munecep rasa ni kuah he, renye iperin Ine ngepas rasa e den nge ikel perin ne ku Ama.

Tuke ku pe nge kurasa mulape, kenak ke tair tair renye mangan. Ari kena Gere seber aku pe langsung mudemui ine. “Nge tasak ke Ine. Pengunen ku, Gere ilen wen, seber sekejepmi, Ijeweb inengku, kunul renye mulo, tengah mu siu oya nampin mulo sekejep mi. Boh mi ine jewebku.

Kuengon Ine renye mungarih kero, dan beredang. Abaro isone pemulo ku engon i oboh Ine gule Ili nge bejantar ku Atan pingen ku. Wan atengku sedep di ini gere kusadari remo Ilih ni awah ku munengon gule Ili, inoh kenak ke tair renye mangan.

Ine ku rupen nge pahem Ike aku Gere ne seber dan gere penah mangan gule Ili. Kemudien Ine munoboh kero ku kowan pingen renye mungini aku mangan. Mangan renye pagan renye gule Ili ni.

Abaro besuep aku. Ine…wow…..sedep pe boh. Gere Ara juel si lagu ni. Demadoh mera dor kite ku empus.. kerna ara gule Ili. Amangku munengon aku senyum senyum, kupen di balik oya Gere kusadari amangku rupen tengah munejer aku bersiramahan urum alam. Selain oya, kupen amangku tegah munuruh ni tradisi dan budaya ni leluhur ku, kune ke jemen, cara e munengkam gule. Ari kerna sedep pe aku pe namah kero mien katan pingen ku.

Nge mari mangan baro Ama becerak sesiro mungune. “Win nge pane ke ko muneldik anak ku, ku jeweb, enge Ama. Ike nge pane, Keta Ini tikik amanah ku, sengkiren lang urum suwi kase ko beluh muneldik dan begule. Ara pepien syarat urum pantangan siturah ijegei dan inget ti ko anak ku.

Pertama : Enti ara rie artie, enti ara sipet sombong dan merasa pasti. Gelah jeroh peceraken dan i mulon urum tawakal dan beriktier.

Kedua : Ike nge atas lo timang atau lo nge Iyo atawa magerip, ulak renye kerna saat te gere nguk kite wan uten.

Baca Juga :  Saksikan Pentas Didong Jalu Malam Penutupan Pacuan Kuda Bener Meriah

Ketige : Gelah jauh mata, karena gere kite betih ara benatang entahkah telkah lipe atau si len len na munenepi kite.

Mumenge amanah ni Ama, ku anguken ulu. Meh oya kene Ama betetah renye, kati tair ulak kite, karena ara ilen urusen i kampung so, kase perin jema pe kite gere bermasyarakat anak ku. Ku jeweb boh mi ama, i seselang ni oya Ine pe becerak, ku angkapen mulo jantar pucuk ni Jepang so, urum terong angur kin nemah ulak. Boh mi Ine, jeweb ku

Tepat pukul lime iyo kami pe nge sawah iumah. Kemudien ku kerkosi mien bukuten penamat ni Ine, ku uke mien ceracak, ara ke ilen gule Ili ne. Enta rupen ara sara tempat enge i keleh ni Ine, male ku uke geh Ine mungowa.

Enti kelok ki ko oya, oya sengeje ku kelehen kin awan mu. Awan urum ananmu kadang wae pe rejen mangan jantar gule Ili. Boh mi ine jewebku Kemudien musaut mien Ama.

“Lagu oya le win ate ni pemen kin jema Tue. Ko puren ara ke kase pemen ni kami Ara ke lagu oya. Kemudien Ine mubeles cerak ni ama sesiro bengis….Enta.! sesanah i bahas arap ni anak. Kam betul Gere betih kemali urum sumang, perin Ine. Ku engon Ama pe lagu kemel kemel kemuh.

Mumenge Ama urum Ine muloi kiruh kiruh kucak, aku pe renye beluh tangkuh Ari umah sesiro dediang. Gere mokot Ari one aku pe demu urum pong pong ku si begeral Ujang Urum Item, we pe ben ulak muniri Ari mersah.
Ari si Kam sine pong, ku jeweb, Ari empus aku urum Ama Ine ku.
Mungune kam i empus? Isela Item. Kuperin inengku ngutip kupi, aku urum amangku beluh muneldik.

Yoh Hana ke muneldik Wen kunei Ujang. Ku jeweb Muneldik munengkam gule lagu cara i Kik ki, tape gere ara mata ni Kik, ke woy. Siara pakek Ketol kin pakan ne.

Yoh…aku pe menet muneldik boh. Hana gule we kona Wen, keperas ke, lokot ke atau mujahir. Ku jeweb gule Ili pong. Gule Ili lagu hana ke model le wen. Oya gule khas dataran tinggi Gayo pong model le loreng, dan mera mudelkap ku atu wan waeh ha. We turah iteldik atau i ge ge i baro mera kona. Biasa e Ike musim uren keruh waeh gule Ili ni tangkuh Ari wan umah he Ari selang selang ni atu.

Mumenge penjelasan ku, pongku Ujang Urum Item muloi ara rasa atau menet beluh muneldik. Kemudien kami pe be peden ter Lo mingu arap sa kami beluh mien muneldik ku empus. Kemudien kami pe beluh berjak Ujang ringkel kampung dang dang Iyo lao. Gere mokot Ari sone nge meling azan Ari mersah so, dan kami pe semiang berjemah megerib. Nge mari semiang baro kami pe ulak ku umah masing masing. Hamdani)

Catatan penulis : “Cerita pendek ini masih jauh dari kesempurnaan sebuah Cerpen. Sementara itu tujuan dari penulisan cerita singket ini, lebih kepada upaya mempertahankan eksistensi dari bahasa Gayo itu sendiri, mengingat saat ini bahasa Gayo sudah berada pada posisi rentan punah. Hal tersebut di akibatkan karena sudah berkurangnya jumlah penutur bahasa Gayo itu sendiri”

Facebook Comments Box

Berita Terkait

Kerna nge Sawah lo Sijeroh, Urum Ulen si Baik, Kadang Ara Salah Langkah, Kadang Ara Salah Tingkah, Keluarga Besar Media Baranews muniro maaf lahir dan batin
Cerite Singket : Kisah Aman Mayak Gere Mangan Bandang
King dan Queen FTV, Qausar dan Masayu Bawa Pulang Si Kembar Pulang ke Aceh
Saksikan Pentas Didong Jalu Malam Penutupan Pacuan Kuda Bener Meriah
Berikut Nama Nama Kuda Yang Akan Berpacu Dibabak Final Besok
Event Pacuan Kuda Bener Meriah Akan Ditutup Dengan Pentas Didong Jalu.

Berita Terkait

Minggu, 31 Maret 2024 - 14:53 WIB

Rudi Tarigan : Ingatkan Kepala Desa Jangan Gelap Mata Gunakan Dana Desa Jelang Lebaran

Minggu, 31 Maret 2024 - 14:36 WIB

Proyek Pengaspalan Jalan Nasional di Wilayah PPK 3.5 Aceh Tenggara Diduga Tidak Gunakan K3 saat Pengaspalan

Kamis, 28 Maret 2024 - 20:37 WIB

Pj. Gubernur Kirim Bantuan Masa Panik Untuk Korban Puting Beliung Aceh Tenggara

Rabu, 27 Maret 2024 - 22:47 WIB

Relawan Meminta Ali Basrah Maju di Pilkada 2024

Sabtu, 23 Maret 2024 - 15:29 WIB

PENJARA Endus Dugaan Keterlibatan Oknum Anggota DPRK Agara Penimbunan Pupuk Subsidi.

Sabtu, 23 Maret 2024 - 14:58 WIB

PPK 3.5 Asal asalan Melaksanakan Pekerjaan Perawatan Saluran Drainase Pada Ruas Jalan Nasional

Sabtu, 23 Maret 2024 - 14:34 WIB

PENJARA Endus Dugaan Keterlibatan Oknum Anggota DPRK Agara Penimbunan Pupuk Subsidi

Sabtu, 23 Maret 2024 - 03:20 WIB

Galian C Ilegal Diduga Marak di Agara, LIRA Minta Polda Aceh ‘Telisik’

Berita Terbaru