oleh

Syaer Gayo

banner 300x250
image_pdfimage_print

KUMPU

Oleh : Fathan Muhammad Taufiq.

 

Rahmat ni Tuhen asa gere pernah rede.

Oya kati turah dele rasa syukur te.

Gere ne tebilang nikmat ni Tuhen.

Bierpen kering waih lut i bubuh kin dawate

Dan meh ranting kayu i bubuh kin penae

 

Pudaha ine nte mulahiren kite

Bersusah payah betaroh jiwe

Sawah akhere kite ara wan denie

Payah ni ine gere lepas tebeles kite

 

Ama beketier mungenal usaha

Kati murip ni anake gere ne nyanya

Ulu kin kiding, kiding kin ulu gere ne kemali

Asal nguk munyenang si buah hate

Jasa ni ama gere terlupenen.

Dak ku seloh pe gere lepas tegantin kite.

 

Umur pitu tun i julen ne aku ku tengku guru.

Kati demu bang kase tikik  ilmu.

Kin bekal murip i masa tue.

Kati enti nyanya murip i denie.

Oya asa harapen ni urang tue nte.

 

Renye beranjak kite ku dewasa.

I perahan paong si setie-setie.

Kin paong murip akherat denie.

Kati enti ate pe karu.

Munyamung keturunen oya nge tentu.

 

Besilo aku pe nge mulei tue.

Uwen beririring atan ni ulu.

Tetap gere putus rahmat ni Tuhen.

Nge kaul anak besilo nge gaeh kumpu.

Asa kumpu mutuah kin pelale nate.

Galak natengku munengone.

Jep dor ke kekalen nate.

Buge bergune morepe kase.

Kin bangsa, agama rum urang tue.

 

Takengen, 14 Juli 2018.

Komentar

Tinggalkan Balasan

Alamat email Anda tidak akan dipublikasikan. Ruas yang wajib ditandai *

News Feed